Die Kalahari Kuierfees het die afgelope paar jaar 'n belangrike inskrywing op die sosiale kalender van Upington en die Kalahari geraak en het laas jaar meer as 30 000 toegangers deur die hekke gelok.  Die Kalahari Kuierfees is vanjaar 9 jaar oud, maar is een van die bes georganiseerde feeste huidiglik in Suid-Afrika.

In die laat tagtigerjare het die Munisipaliteit van Upington 'n Waterfees aangebied wat tot gevolg gehad het dat SAD Wingerdvrugte besluit het om hierdie Fees verder uit te brei.  Hierdie inisiatief het aanleiding tot die SAD Rosyntjiefees gegee en SAD was vir die daaropvolgende 8 jaar die hoofborg.

Maar verandering is onvermydelik en in 2000 het die SAD amptelik die Fees na die gemeenskap van Upington oorgedra en sodoende is die Kalahari Kuierfees gebore.  Tans is die Kalahari Kuierfees 'n artikel 21-maatskappy wat hom ten doel stel om 'n gesinsfees aan te bied - deur die gemeenskap vir die gemeenskap.  Die Feeskomitee en Direksie poog om die Kuierfees oor alle grense heen te bemark om sodoende sport, kuns en kultuur en plaaslike toerisme te bevorder.

So het 'n unieke Fees ontstaan wat die omgewing weerspieël.  Die Kalahari Kuierfees onderskryf Afrikaans as taal, sport, inheemse kos, streeksprodukte, die natuur, eiesoortige kulture, teater en opbouende musiek - terwyl die verskillende teikengroepe in aanmerking geneem word.

Die Kalahari Kuierfees word gekenmerk deur 'n verskeidenheid sportsoorte soos die Kumba Iron Ore Classic, vlugbal, 'n halfmarathon en 'n gholfdag.  En daar is ook 'n avontuur-resies vir skoliere.  Die Upington Toyota Bybelgenootskap pretstap lok jaarliks honderde stappers.

Aktiwiteite word nie net op die Eiland Feesterrein aangebied nie maar ook op talle goed geleë venues soos die Meerkatgat vir die wat "jonk van gees" is.  Die Fees het ook die ABSA Vryverhoog waar toeskouers gratis na kunstenaars kan gaan luister. Jaarliks is daar 180 kunsmar-stalletjies wat aan elke smaak voldoen.

Die Kalahari Kuierfees is dus 'n unieke en opwindende Afrikaanse gemeenskapsfees.  En vanjaar is die amptelike slagspreuk juis: "Fees sonder Brieke".